Пункціры. – Мінск : Логвінаў, 2010. – 76 с.

ISBN 978-985-6901-74-7

Кнігу склалі новыя пункціры (акупункціры) Алеся Разанава.

*

Воплескі даланёю
адною:
лунае
кляновы ліст над зямлёй.

*

Дык уздымайся!.. –
Драбіну
спускае з гары
ручай.

*

Імжа:
расплылася мяжа
між тым, што было,
што будзе.

*

Падае –
у падзеі
пытаецца: "Дзе я?"
ліст.

*

Некалі быў тут?!.
Згадкай
абмацваю зоркі
і камяні.

*

Парушаны –
мур
гутарыць нема
з некім.

*

Канаты святла:
з цемрыні
цягнуцца вуліцай
аўтамабілі.

*

Брава-выява:
ўвабраўся
ў мелодыю барваў
лес.

*

Прыгожая –
у абдымкі
вецер бярэ бярозу:
"Ляцім са мной!.."

Біяграфія Алеся Разанава на сайце Родныя вобразы.