Абвестка

 

 

 

У выпадку ўзнікнення дадатковых пытанняў будзем радыя адказаць на іх штодня з 10.00 да 18.00 па тэлефонах: +375-29-856-42-01 Міхась, Viber / WhatsApp: +375-29-632-91-29 Вераніка.
Або па электроннай пошце: prastora@prastora.by
І ў сацыяльных сетках: Facebook, уКантакце або Інстаграм.

 

 

 

“Беларуская Прастора” запрашае сяброў на прэзентацыю сваіх выданняў!

24 снежня 2013 года (аўторак) культурніцкая пляцоўка “Беларуская Прастора” запрашае на прэзентацыю аўдыёкнігі Янкі Маўра “Палескія рабінзоны”, “У краіне райскай птушкі” і насценнага “ВАЯРСКАГА КАЛЕНДАРА”.

Прастора запрашае сяброў на прэзентацыю сваіх выданняў!


Прэзентацыя адбудзецца ў Пушкінскай бібліятэцы (Мінская абласная бібліятэка імя А. С. Пушкіна) па адрасе: г. Мінск, вул. Гікалы, 4. Пачатак а 18-й гадзіне. Уваход вольны.

У імпрэзе возьмуць удзел: унукі Янкі Маўра, Барыс Пятровіч, Алесь Пашкевіч, Зміцер Сасноўскі, Аксана Спрынчан, Яраш Малішэўскі, Тацяна Беланогая, Серж Мінскевіч, Юры Усціновіч, Ладзімір Лічко, Іван Іваноў, Андрэй Паддубскі, Алесь Калоша, Міхась Башура, Алесь Квіткевіч.

Вас чакаюць цікавыя музычныя і літаратурныя выступы, конкурсы з падарункамі, захапляльныя рыцарскія баёўкі ад клуба гістарычнай рэканструкцыі “Гівойт” і магчымасць сфатаграфавацца з сапраўднымі рыцарамі!

Чытаць цалкам — пра імпрэзу і пра выданні.

Замаўляй на Прасторы — атрымай у калідоры! :)

Замаўляй на Прасторы — атрымай у калідоры!

Прывітаньне, шаноўныя сябры Беларускае Прасторы! Радыя паведаміць вам, што наш сэрвіс, бы той гоначны балід, рухаецца — калі не сказаць імчыць:) — наперад і паступова разьвіваецца! І нават нягледзячы на тое, што некаторыя паляпшэньні (пра якія мова пойдзе трохі ніжэй) датычаць пакуль што толькі сталіцы і яе прадмесьцяў, мы спадзяёмся і цьвёрда верым, што недалёка ў будучыні ўжо той час, калі ўсьцяж па ўсёй краіне станецца тое, што кагадзе сталася ў Менску.

А сталася акурат наступнае: пасьля пасьпяхова пройдзенага тэст-драйву — або, па-іншаму, невялічкага выпрабавальнага пэрыяду — у інтэрнэт-краме Prastora.by запрацавала кур'ерская дастаўка па Менску і ваколіцах — такіх як Калодзішчы, Калядзічы, Сокал, Ждановічы і нават горад-спадарожнік сталіцы Смалявічы. Так адбылося, што гэта супала з чарговым падвышэньнем тарыфаў Белпошты, так што цяпер жыхарам Менску і яго ваколіцаў у пераважнай большасьці выпадкаў нашмат выгадней замаўляць кур'ерскую дастаўку з Prastora.by адразу дахаты або, скажам, на працу, — эканомячы пры гэтым таксама час, які потым давялося б выдаткаваць на візыт у паштовае аддзяленьне.

Так што цяпер прынамсі для менчукоў наш слоган "Мары з дастаўкай!" набыў новае, яшчэ больш актуальнае гучаньне, якое мы ў жартаўлівай форме сфармулявалі наступным чынам: "Замаўляй на Прасторы — атрымай у калідоры!":) І для гэтага трэба ўсяго толькі, робячы наступную замову, выбраць "Дастаўка кур'ерам" — і мы прывязём вам замову ў Менску і пералічаных вышэй прадмесьцях на любы зручны для вас адрас.

Вось, але ж, як кажуць, не адною сталіцаю жыве Беларусь! І калі казаць, напрыклад, пра Магілёўскую вобласьць, то ёсьць у нас яшчэ адна цікавая гісторыя ))) ...

Віртуальная аўтограф-сэсія: Уладзімер Арлоў

Віртуальная аўтограф-сэсія: Уладзімер Арлоў

Шаноўныя сябры! Увага-увага-увага! Па шматлікіх просьбах мы… робім яшчэ раз тое, пра што нас гэтулькі разоў прасілі! :))

А менавіта вось што: ня так даўно праз нашую старонку ў сацыяльнай сетцы Фэйсбук мы ладзілі такую акцыю, калі кожны ахвочы мог папрасіць аўтара кніг "Краіна Беларусь" (на ўсіх мовах) і "Краіна Беларусь. Вялікае Княства Літоўскае" пакінуць аўтографы для сябе або для сваіх сяброў, блізкіх — і нават далёкіх :) — каму за акіян сваяку паслаць, а каму яшчэ кудысьці…

Словам, абсалютна любое пажаданьне, якое пакупнік пакідаў у камэнтары да замовы на Prastora.by, а Уладзімер Арлоў потым ашчадна пераносіў яго на запаветны асобнічак папулярнае кнігі. Нагоды былі розныя: дні нараджэньня і юбілеі, шлюб, гадавіна нейкае адмысловае даты або проста харошы дзень у жыцьці кагосьці з нашых кліентаў. І — вось табе маеш! — акцыя па пэўным часе скончылася, а добрыя нагоды, як выявілася, сканчацца нават ня думалі! :)

І таму мы проста абавязаныя ў другі раз зрабіць тое, што сталася прычынаю такое колькасьці станоўчых эмоцыяў у першы раз. А значыць — паўтарыць аўтограф-сэсію выдатнага пісьменьніка і (чым мы вельмі-вельмі ганарымся) нашага добрага сябра спадара Ўладзімера Арлова! Толькі гэтым разам яшчэ і пашырыць яе на абсалютна ўсе выданьні — кнігі ды аўдыёкнігі — аўтарам якіх зьяўляецца спадар Арлоў і якія мы маем у наяўнасьці.

Чытаць цалкам — тут.

Новы навучальны год — быць ня можа без прыгод!

Новы навучальны год — быць ня можа без прыгод!

Шаноўныя сябры! Блізіцца месяц верасень – а разам зь ім і наступны навучальны год. А які ж канец лета можа абысьціся без прыгодаў?! Правільна, ніякі! Пагатоў, калі сёлета адзначаецца 130-годзьдзе з дня нараджэньня клясыка дзіцячае літаратуры Янкі Маўра, які шмат і плённа працаваў менавіта ў гэтым жанры – пісаў займальныя прыгодніцкія творы для дзяцей і падлеткаў.

Таму мы таксама пастанавілі не заставацца ў баку і адзначыць абедзьве гэтыя падзеі – юбілей слыннага пісьменьніка і пачатак чарговых штудыяў для школьнікаў, студэнтаў (ну і, безумоўна, іхных бацькоў (якія месцамі маюць клопату значна болей, чымся іхныя дзеці :) – і з прыемнасьцю паведамляем вам наступнае:

Інтэрнэт-крама Prastora.by і гуказапісвальная кампанія BelTonMedia выпусцілі дыск з прыгодніцкімі аповесцямі "Палескія рабінзоны" і "У краіне райскай птушкі"! Гэтыя творы, цяпер запісаныя і выдадзеныя ў фармаце аўдыёкнігі, упершыню выйшлі друкам яшчэ ў 1930-я гады, і вось ужо каторае дзесяцігоддзе заслужана займаюць сваё пачэснае месца ў школьнай праграме па роднай літаратуры. Чым ня добрая нагода праслухаць ды прыгадаць яшчэ раз, колькі прыгодаў мелі два беларускія хлапцы Віктар і Мірон сярод непаўторнае беларускае палескае прыроды!

Трохмоўная Краіна Беларусь ды іншыя кніжныя цікавосткі

Трохмоўная Краіна Беларусь

Шаноўныя сябры, мы радыя прадставіць вашай увазе ўнікальнае выданьне, пра якое дагэтуль ня чуў, мабыць, толькі ве-е-е-е-е-е-льмі лянівы або доўгі час адарваны ад інфармацыйнае прасторы чалавек. Дакладней, не адно выданьне, а цэлых тры: фаліянт "Краіна Беларусь" адразу на трох мовах трыма рознымі кнігамі.

Першае выданьне – тады яшчэ выключна па-беларуску – суаўтары Ўладзімер Арлоў і Зьміцер Герасімовіч выдалі ў далёкім 2003, і адразу тады ўжо было відавочна: проста як паветра неабходныя пераклады гэтае кнігі на іншыя мовы, каб несьці і шырыць у сьвеце праўдзівыя веды пра велічную эўрапейскую беларускую мінуўшчыну – такую, якою яна сапраўды была. Бо, як трапна сказаў сам Уладзімер Арлоў: "Нашая эўрапейская мінуўшчына ёсьць пропускам у нашую эўрапейскую будучыню". Нельга не пагадзіцца, і бадай ня трэба тут нічога болей дадаваць.

Чэрвень пад знакам Быкава

Васіль Быкаў

Суровая скала, выкрамненая лютымі вятрамі, — Васіль Быкаў.
Рыгор Барадулін

 

Чэрвень 2013 года можна ўмоўна назваць месяцам Васіля Быкава. 19 чэрвеня быў Дзень нараджэньня пісьменьніка, а 22 чэрвеня мінула роўна дзесяць год, як на аднаго Вялікага Беларуса стала меней. Многія небеспадстаўна называлі і працягваюць называць яго Сумленьнем Нацыі, а што да беларускай літаратуры, то без аніякіх сумневаў, ягоныя творы застануцца ў ёй назаўсёды.

З гэтай нагоды на Prastora.by зьявіліся некалькі рэдкіх і маладаступных выданьняў – як уласна аўтарства Васіля Быкава, так і пра яго.

Бэстсэлер за травень "Сфагнум" ды іншыя кніжныя цікавосткі!

Марціновіч Віктар. Сфагнум / аўтар

Шаноўныя сябры, дазвольце зьвярнуць вашую ўвагу на тое, што кагадзе на Prastora.by зьявіўся новы раман Віктара Марціновіча "Сфагнум", рэліз якога адбыўся напрыканцы траўня і які ўжо ставіць рэкорды па продажах у цэлым па краіне! Па-беларуску твор выйшаў асобным папяровым выданьнем у перакладзе Віталя Рыжкова, тады як па-расейску ён зьявіўся толькі ў выглядзе электроннае кнігі.

Апублікаваны ў выдавецтве "Кнігазбор" (у сэрыі "Кнігарня пісьменніка"), згодна са статыстыкаю "Белкнігі", за апошнія тры дні месяца гэты раман стаў лідарам продажаў за травень. Чым жа прывабная для шырокага чытацкага кола гэтая кніга?

Крытык Ганна Янкута ў рэцэнзіі на раман "Сфагнум" адзначае: "Калі ўявіць сабе кампазыцыю "Сфагнума" ў выглядзе шкілета, то гэта будзе адзін з самых добра складзеных і гарманічных шкілетаў, зь якімі я сутыкалася апошнім часам у беларускай літаратуры. Агульны ход падзеяў у творы вывераны добра, напружанне дазуецца акуратна, зацягнутых эпізодаў, якія прымусілі б асабліва нецярплівага чытача пераскокваць праз абзацы, няма".

А на сайце 34mag.net паведамляецца, што замежныя выдаўцы Марціновіча ўжо празвалі гэты раман "„Карты, грошы, два ствалы“ ў беларускай правінцыі", зьмясціўшы яго ў нішу "гангстэрскай камэдыі".

Так ці іначай, але скласьці ўласнае меркаваньне можна толькі прачытаўшы кнігу. То ж чытайма! :)

Калядныя і навагоднія віншаваньні ад Prastora.by

Шаноўныя сябры!

Калектыў Prastora.by шчыра зычыць вам усяго самага сьветлага ў наступным, 2013 годзе! Час бяжыць без звароту, і, як ужо стала ўсім без вынятку відавочна, што ў 2012-м канец сьвету не наступіў, то значыць — будзем жыць і пашыраць Беларускую Прастору і ў наступным, і ў тых, што будуць за ім гадах і дзесяцігодзьдзях! :)

Будзьце заўсёды ў гуморы — а мы будзем радыя вам на Прасторы! )))

Ну а напрыканцы віншаваньня дазвольце невялічкую рэтраспэктыву ў дзесяцігодзьдзі ранейшыя, бо хоць час і бяжыць няўмольна наперад, але ўсё ж цікава бывае часам азірнуцца назад ды паглядзець, як яно было тады... Прыемнага прагляду і яшчэ раз з Новым годам, спадарства!

Анатоль Волкаў, 1976 год.

Паглядзець болей навагодніх плякатаў даўнейшых гадоў можна, націснуўшы на малюнак або "Чытаць цалкам" ніжэй.

Калядная акцыя — "Будзьма з Prastora.by!"

Шаноўныя сябры!

Кампанія "Будзьма беларусамі!" і Prastora.by супольна падрыхтавалі да Калядаў сьвяточную акцыю, удзельнікі якое маюць магчымасьць атрымаць адмысловыя падарункі.

Сэнс акцыі вельмі просты і заключаецца ў наступным: цягам месяца (а можа нават і трохі болей...) у інтэрнэт-краме Prastora.by пэўныя тавары будуць атрымліваць яркі цэтлік Тавар з акцыі "Будзьма з Prastora.by!", што будзе азначаць, што гэты тавар уваходзіць у сьпіс тых, набываючы якія, Вы маеце магчымасьць атрымаць адмысловыя прызы ад кампаніі "Будзьма беларусамі!" і нашае крамы.

Арганізатары пакідаюць за сабою права павялічваць і дапаўняць сьпіс падарункаў, на дадзены ж момант іх пералік выглядае наступным чынам: фірмовыя торбачкі, беларускамоўныя налепкі на клявіятуру, наборы паштовак, а таксама музычныя складанкі розных стыляў — ад року да фольку.

Жывая трансьляцыя з Дня нараджэньня Ўладзіміра Караткевіча

Неўзабаве тут будзе выкладзенае відэа з падзеі 26 лістапада 2012 году, калі ў Менскай абласной бібліятэцы прэзэнтавалі новыя аўдыёкнігі Ўладзімера Караткевіча.