Тастамент. Выбраныя творы / Рыгор Барадулін.— Мінск : Папуры, 2015.— 288 с.

ISBN: 978-985-15-2489-7

У кнігу ўвайшлі выбраныя творы Народнага паэта Беларусі, намінанта Нобелеўскай прэміі па літаратуры Рыгора Барадуліна. У ёй змешчаны як хрэстаматыйныя творы, так і эсэ, запісы, вершы апошніх гадоў і дзён.

“Роўных Рыгору Барадуліну няма сярод сучаснікаў. Ён адзіны, хто здолеў, як і тыя першыя, якіх немагчыма палепшыць, увабраць у сябе ці не ўсю беларускую спрадвечнасць. Тую, у якой нават вецер гнёзды ўе.

Хрышчоны ва ўніяцтве, Барадулін называе сябе крывічом і кшчоным паганцам. Называе нездарма, бо ўвабраў у сябе жыццядайны крывіцкі дух, удыхнуўшы з ім усю нашую мову.

Ён — адзіны беларускі паэт, які існуе толькі ў мове і выключна ў ёй. Існуе гэткім жа цудам, якім сама мова існуе ў пабураным — альбо дасюль не створаным — беларускім свеце.

Музыка не патрабуе перакладу, паэзія не перакладаецца. Геніяльны паэт роўны самому сабе толькі на сваёй мове,

Рыгор Барадулін роўны самому сабе адно па-беларуску.

Зрэшты, як і народ роўны самому сабе толькі на сваёй зямлі і са сваёй моваю.”
Уладзімір Някляеў